கிறிஸ்தவ உலகின் உச்ச மத தலைவராக இருந்த போப் பிரான்சிஸ் நீண்ட கால நோய்வாய்ப்பின் பின்னர் 88 வயதில் காலமானார். இதையடுத்து, புதிய போப்பை தேர்வு செய்யும் செயற்பாடுகள் தீவிரமாகி வருகின்றன.
கத்தோலிக்க திருச்சபையின் விதிகளின்படி, 80 வயதுக்குட்பட்ட கார்டினல்கள் மட்டுமே வாக்களிக்கத் தகுதி பெற்றவர்கள். தற்போது, உலகம் முழுவதும் உள்ள 252 கார்டினல்களில் 138 பேர் இந்தத் தேர்தலில் பங்கேற்க முடியும். இதில் நான்கு இந்தியர்கள் அடங்கியிருப்பது, இந்தியாவின் வளர்ந்து வரும் செல்வாக்கை வெளிப்படுத்துகிறது.
போப்பைத் தேர்ந்தெடுக்கும் மாநாடு – கான்கிளேவ் என அழைக்கப்படும் – போப்பின் மறைவுக்குப் பிந்தைய 15 முதல் 20 நாட்களுக்குள் வாடிகனில் நடைபெறும். இதில் மூன்றில் இரண்டு பங்கு பெரும்பான்மை வாக்குகளைப் பெற்றவரே புதிய போப்பாக தேர்வாகிறார். பொதுவாக, இந்த தேர்தல் நடைமுறை 15-20 நாட்கள் வரை நீடிக்கக்கூடும்.
4 இந்திய கார்டினல்கள்:
1. கார்டினல் பிலிப்பே நேரி ஃபெராவ்: கோவா மற்றும் டாமனின் பேராயராகவும், மதங்களுக்கு இடையேயான உரையாடல், குடியேற்றம் மற்றும் காலநிலை மாற்றம் குறித்த பிரச்சினைகளில் முன்னிலை வகிக்கிறார்.
2. கார்டினல் கிளீமிஸ் பசேலியோஸ்: சிரோ-மலங்கரா திருச்சபையின் மேஜர் பேராயர். 2012ஆம் ஆண்டு கார்டினலாக நியமிக்கப்பட்ட முதல் சிரோ-மலங்கரா உறுப்பினர்.
3. கார்டினல் அந்தோணி பூலா: ஹைதராபாத் பெருநகர பேராயராக இருந்து வரும் அவர், முதல் தலித் மற்றும் தெலுங்கு கார்டினலாக வரலாற்று சாதனை படைத்துள்ளார்.
4. கார்டினல் ஜார்ஜ் ஜேக்கப் கூவக்காடு: சிரோ-மலபார் திருச்சபையைச் சேர்ந்தவர். வத்திக்கானில் மதங்களுக்கு இடையேயான உரையாடலுக்கான டிகாஸ்டரியின் தலைவர்.
இந்தியாவின் நான்கு முக்கிய கார்டினல்களின் பங்கேற்பு, உலகளாவிய கத்தோலிக்க அமைப்பில் நாட்டின் முக்கியத்துவத்தை வலியுறுத்துகிறது. புதிய போப்பாண்டவரை தேர்வு செய்யும் இந்த வரலாற்றுச் சந்தர்ப்பம், இந்திய கத்தோலிக்க சமூகத்திற்கு பெருமை சேர்க்கும் நிகழ்வாக இருக்கலாம்.