தமிழ்நாடு மணல் குவாரி உரிமையாளர்கள் கூட்டமைப்பின் சார்பில் மே 23ஆம் தேதி முதல் மாநிலம் முழுவதும் மணல் லாரிகள் இயக்கம் நிறுத்தப்படும் என அறிவிக்கப்பட்டுள்ளது. இந்தப் போராட்டம் விவசாயம் மற்றும் கட்டுமான துறையை பாதிக்கும் வகையில் முக்கியமானதொரு நடவடிக்கையாக காணப்படுகிறது.
இந்த வேலைநிறுத்தம் குறித்து மாநிலத் தலைவர் யுவராஜ் கூறியதாவது:
“கடந்த 1½ ஆண்டுகளாக மணல் குவாரிகள் இயங்கவில்லை. இதனால் மாற்றாக எம்.சாண்ட் பயன்படுத்தப்படுகிறது. ஆனால் ஜல்லி, எம்.சாண்ட், பி.சாண்ட் ஆகியவற்றின் விலை கடந்த காலங்களில் இரண்டு முறை யூனிட்டுக்கு ரூ.1000 வீதம் உயர்த்தப்பட்டுள்ளது. கட்டுமானப் பொருட்களின் விலை ஏறியதால் கட்டுமான பணிகள் கடுமையாக பாதிக்கப்பட்டுள்ளன.
அரசு சமீபத்தில் ரூ.1000 வரை விலை குறைக்கப்படும் என அறிவித்தது. ஆனால் அது நடைமுறையில் காணப்படவில்லை. இதற்கிடையில் கல் குவாரிகளுக்கு கேரளாவில் விதிக்கப்பட்ட தடையால், தமிழகத்திலிருந்து சட்டவிரோதமாக லாரிகளில் கல் கடத்தல் நடைபெறுகிறது. இதனால் தமிழக அரசுக்கு ஆண்டுக்கு ரூ.25 கோடி வருவாய் இழப்பாகும்.”
தொடர்ந்து அவர் கூறியதாவது:
“இத்தனை அவலங்களுக்கிடையே, மணல் லாரி உரிமையாளர்களின் வாழ்வாதாரம் கடுமையாக பாதிக்கப்பட்டுள்ளது. இதுபற்றி அரசு எந்த நடவடிக்கையும் எடுக்கவில்லை. எனவே, மணல் குவாரிகளை விரைவாகத் திறக்க வேண்டும், விலை உயர்வை கட்டுப்படுத்த வேண்டும் மற்றும் குவாரிகளை அரசுடமையாக்க வேண்டும் என்ற கோரிக்கைகளை வலியுறுத்தி, மே 23ஆம் தேதி முதல் தமிழகம் முழுவதும் மணல் லாரிகளை இயக்காமல் காத்திருப்பு போராட்டத்தில் ஈடுபட உள்ளோம்.”
இந்த வேலைநிறுத்தம் மாநிலத்தின் கட்டுமானத் துறையில் பரவலான தாக்கத்தை ஏற்படுத்தும் என எதிர்பார்க்கப்படுகிறது.