நாகை சுனாமி குடியிருப்பில் இன்று (வெள்ளிக்கிழமை) காலை கட்டுமான தொழிலாளி விஜயகுமாரின் வீட்டின் மேற்கூரை இடிந்து விழுந்ததில், அவரது 2 வயது மகன் யாசிந்தராமன் உயிரிழந்தார். மேலும், குழந்தையின் தாயார் படுகாயமுற்று சிகிச்சைக்காக ஒரத்தூர் மருத்துவக் கல்லூரி மருத்துவமனையில் அனுமதிக்கப்பட்டுள்ளார்.
2004ல் சுனாமி காரணமாக பாதிக்கப்பட்ட மக்களின் மறுவாழ்வுக்காக அரசு மற்றும் தனியார் தொண்டு நிறுவனங்களின் உதவியுடன் நாகையில் கான்கிரீட் வீடுகள் கட்டிக்கொடுக்கப்பட்டது. மீனவ கிராமங்கள் மட்டுமல்லாது, கடற்கரை பகுதியில் வசித்த அனைத்து மக்களுக்கும் வீட்டுகள் அமைக்கப்பட்டன.
குறிப்பாக, செல்லூர் சுனாமி குடியிருப்பில் வசித்து வரும் விஜயகுமாரின் வீட்டின் மேற்கூரை இன்று காலை திடீரென இடிந்து விழுந்தது. இதில் மின் விசிறியும் விழுந்து, விபத்து ஏற்பட்டு, அவரது 2 வயது மகன் யாசிந்தராமன் உடனடியாக உயிரிழந்தார்.
சேதமடைந்த சுனாமி குடியிருப்பு வீடுகள், தொடர்ந்து அவ்விடத்தில் வசிக்கும் மக்களுக்கு அச்சுறுத்தலாக மாறி வருகின்றன. இதனைச் சுட்டிக்காட்டி, பொதுமக்கள், வீடுகளின் தரத்தை சரிபார்த்து, எதிர்காலத்தில் இதுபோன்ற சோகம் மீண்டும் நிகழாமல் தடுக்கும் விதமாக அரசு நடவடிக்கை எடுக்க வேண்டும் என்று கோரிக்கை விடுத்துள்ளனர்.