மாநில செயலாளர் மாரடைப்பால் உயிரிழப்பு!

தமிழக வெற்றிக் கழகத்தின் புதுச்சேரி மாநில செயலாளர் சரவணன் மாரடைப்பால் உயிரிழந்தார்.

புதுச்சேரி: தமிழக வெற்றிக் கழகத்தின் புதுச்சேரி மாநில செயலாளராக இருந்த சரவணன் (47) மாரடைப்பால் உயிரிழந்தார்.தமிழக வெற்றிக் கழகத்தின் பொதுச் செயலாளர் புஸ்சி ஆனந்தின் நம்பிக்கையாளர் என்று கருதப்பட்ட சரவணன், நடிகர் விஜய் சார்ந்த பல நிகழ்வுகளிலும் முக்கியப் பங்கை வகித்து வந்தார். விரைவில் விக்கிரவாண்டியில் நடைபெறவிருந்த மாநாட்டுக்கான ஏற்பாடுகளிலும் அவர் தீவிரமாக ஈடுபட்டிருந்தார்.

நேற்று (அக்டோபர் 21) விக்கிரவாண்டியில் இருந்து தனது பணிகளை முடித்துக்கொண்டு வீடு திரும்பிய சரவணன், இன்று மாலை வீட்டில் இருந்தபோது திடீரென நெஞ்சு வலியால் பாதிக்கப்பட்டார். உடனடியாக அவரை அரசு மருத்துவமனைக்கு கொண்டு சென்றபோதும், மருத்துவர்கள் அவர் ஏற்கனவே உயிரிழந்துவிட்டதாக அறிவித்தனர்.

சரவணனின் உடல் தற்போது புதுச்சேரி சித்தன்குடியில் உள்ள அவரது வீட்டில் வைக்கப்பட்டுள்ளது. அவரது திடீர் மறைவு தமிழக வெற்றிக் கழக உறுப்பினர்களிடையே பெரும் சோகத்தை ஏற்படுத்தியுள்ளது.