ஜேம்ஸ் கேமரூன் இயக்கத்தில் 2009ஆம் ஆண்டு வெளியான “அவதார்” படம் உலகம் முழுவதும் மாபெரும் வெற்றியை கண்டது. இரண்டு மணி நேரம் 40 நிமிடங்களாக நீடித்த இத்திரைப்படம் பார்வையாளர்களை மற்றொரு உலகுக்கே அழைத்துச் சென்றது. 25 கோடி அமெரிக்க டாலர்கள் செலவில் தயாரிக்கப்பட்ட இத்திரைப்படம், உலகம் முழுவதும் 280 கோடி அமெரிக்க டாலர்கள் வரையில் வசூல் செய்தது. இதுவரை வேறு எந்த திரைப்படமும் காணாத அளவுக்கு வசூல் சாதனையை “அவதார்” நிகழ்த்தியது.
இந்த வெற்றியின் பின்னர், 12 ஆண்டுகள் கழித்து, “அவதார்” படத்தின் இரண்டாம் பாகம் 2022 ஆம் ஆண்டு டிசம்பர் 16ஆம் தேதி உலகம் முழுவதும் 52,000 திரைகளில் வெளியானது. படத்துக்கு கலவையான விமர்சனங்கள் கிடைத்தாலும், இந்தப் படம் சுமார் 15,000 கோடி ரூபாய் வசூலித்தது.
இந்நிலையில், “அவதார் 3” படத்தின் தலைப்பு “ஃபயர் அண்ட் ஆஷ்” (நெருப்பும் சாம்பலும்) என அறிவிக்கப்பட்டுள்ளது. டி23 எக்ஸ்போ நிகழ்ச்சியில் பங்கேற்ற ஜேம்ஸ் கேமரூன், “இதுவரை காணாத பண்டோரா (துணைக்கோள்) இப்போது பார்க்கலாம். இது ஒரு உணர்ச்சி பூர்வமான அனுபவமாகவும், கண்களுக்கு விருந்தாகவும் இருக்கும்” என்று தெரிவித்துள்ளார். “அவதார் 3” திரைப்படம் 2025ஆம் ஆண்டு டிசம்பர் 19ஆம் தேதி திரையரங்குகளில் வெளியிடப்படும் என்றும் அவர் அறிவித்துள்ளார்.
